अमेरिकामा ६ वर्षदेखि सम्पर्कविहीन रहेका नेपाली नागरिक धिरेन्द्र जंग शाहको खोजी कार्यमा सहयोग गर्न अमेरिकास्थित नेपाली राजदूतावासले आग्रह गरेको छ।
राजदूतावासले सूचना जारी गर्दै बाँकेको नेपालगञ्ज उपमहानगरपालिका–९, विशाल नगरका ३० वर्षीय शाहको खोजीमा सहयोग गरिदिन अमेरिकामा रहेका नेपाली नागरिक तथा संघसंस्थालाई अनुरोध गरेको हो।
राजदूतावासका अनुसार शाह लामो समयदेखि परिवारको सम्पर्कमा छैनन्।
उनको परिवारबाट सम्पर्कविहीन भएको जानकारी प्राप्त भएपछि राजदूतावासले सम्बन्धित प्रहरी कार्यालयमा खोजीका लागि अनुरोध गर्नुका साथै निरन्तर समन्वय गरिरहेको जनाएको छ।
तर, हालसम्म उनको अवस्थाबारे कुनै महत्त्वपूर्ण जानकारी प्राप्त हुन नसकेको सूचनामा उल्लेख छ।
शाह वि.सं. २०७१ मा डाइभर्सिटी भिसामार्फत पहिलोपटक अमेरिका पुगेका थिए।
त्यसको दुई वर्षपछि वि.सं. २०७३ मा नेपाल फर्किएका उनी पुनः अमेरिका गएका थिए।
त्यसयता विगत ६ वर्षदेखि सम्पर्कविहीन रहेको राजदूतावासले जनाएको छ।
राजदूतावासले अमेरिकामा रहेका नेपाली समुदाय, संघसंस्था तथा अन्य सरोकारवालालाई शाहको खोजी कार्यमा सहयोग गर्न आग्रह गरेको छ।
उनीबारे कुनै महत्त्वपूर्ण जानकारी प्राप्त भएमा यथाशीघ्र राजदूतावासलाई उपलब्ध गराउन पनि अनुरोध गरेको छ।
शाहबारे जानकारी भएमा राजदूतावासको इमेल ठेगाना info@nepalembassyusa.org वा consular@nepalembassyusa.org मा सम्पर्क गर्न सकिनेछ।
त्यस्तै, राजदूतावासको आधिकारिक वेबसाइटमा उपलब्ध सामान्य सोधपुछका नम्बर २०२-७७४-४७८० र २०२-४८०-६८५८ मा पनि सम्पर्क गर्न सकिन्छ।
